Last Updated:
വിവാഹം ഉറപ്പിച്ച സമയത്തും അതിന് ശേഷവും സമ്മാനമായി ഐഫോണും 73,703 രൂപയും ഉള്‍പ്പെടെ ആകെ 7,57,037 രൂപയുടെ സാധനങ്ങളും പണവും നല്‍കിയെന്നും അത് ഇവർ തിരികെ നല്‍കിയില്ലെന്നുമാണ് പരാതിയില്‍ വ്യക്തമാക്കുന്നത്
വിവാഹം ഉറപ്പിച്ച് മോതിരംമാറിയശേഷം ഐഫോണും 7 ലക്ഷത്തിലധികം രൂപയും വാങ്ങി ബന്ധത്തിൽ നിന്ന് പിന്മാറിയെന്ന പ്രതിശ്രുത വരന്റെ മാതാവിന്റെ പരാതിയിൽ പ്രതിശ്രുത വധുവിനും വീട്ടുകാർക്കുമെതിരെ പോലീസ് കേസെടുത്തു. കാഞ്ഞങ്ങാട് പടന്നക്കാട് കരുവളം സ്വദേശിനി ഇ അലീമ (47) നല്‍കിയ പരാതിയില്‍ ഉദുമ പഞ്ചായത്ത് പരധിയിലെ റിസാന (20), മാതാവ് ഖൈറുന്നീസ (38), സഹോദരൻ റിയാസ് (45) എന്നിവർക്കെതിരെയാണ് കേസ്. കോടതി നിർദേശ പ്രകാരമാണ് പ്രതികള്‍ക്കെതിരെ കേസെടുത്തിരിക്കുന്നത്.
ഹൊസ്ദുർഗ് പോലീസ് രജിസ്റ്റർ ചെയ്ത കേസ് പ്രകാരം 2026 ഏപ്രില്‍ 5നാണ് റിസാനയുമായി അലീമയുടെ മകനുമായുള്ള വിവാഹം ഉറപ്പിച്ചത്. ബേക്കല്‍ ഫോർട്ട് റിസോർട്ടില്‍ വെച്ചായിരുന്നു വിവാഹ നിശ്ചയ ചടങ്ങുകള്‍ നടന്നത്. വിവാഹം ഉറപ്പിച്ചശേഷം റിസാനയും മാതാവും സഹോദരനും ചേർന്ന് പരാതിക്കാരിയെയും മകനെയും വഞ്ചിക്കണമെന്ന ഉദ്ദേശത്തോടെ ഗൂഢാലോചന നടത്തിയെന്നാണ് പരാതിയിലെ പ്രധാന ആരോപണം. തുടർന്ന് വിവാഹബന്ധത്തില്‍ താല്പര്യമില്ലെന്ന് അറിയിച്ച്‌ റിസാന ബന്ധത്തില്‍നിന്ന് പിന്മാറിയതായും പരാതിയില്‍ പറയുന്നു.
വിവാഹം ഉറപ്പിച്ച സമയത്തും അതിന് ശേഷവും സമ്മാനമായി ഐഫോണും 73,703 രൂപയും ഉള്‍പ്പെടെ ആകെ 7,57,037 രൂപയുടെ സാധനങ്ങളും പണവും നല്‍കിയെന്നും അത് ഇവർ തിരികെ നല്‍കിയില്ലെന്നുമാണ് പരാതിയില്‍ വ്യക്തമാക്കുന്നത്. വിവാഹബന്ധത്തില്‍നിന്ന് പിന്മാറിയശേഷം നല്‍കിയ പണവും ഫോണും തിരികെ ആവശ്യപ്പെട്ടെങ്കിലും പ്രതികള്‍ തയാറായില്ലെന്നും ഇതുവഴി തങ്ങളെ വഞ്ചിച്ചെന്നുമാണ് പരാതിക്കാരിയുടെ ആരോപണം.
പരാതിക്കാരി കോടതിയെ സമീപിക്കുകയായിരുന്നു. തുടർന്ന് കോടതിയില്‍നിന്ന് ലഭിച്ച നിർദേശത്തിൻ്റെ അടിസ്ഥാനത്തിലാണ് പോലീസ് കേസെടുത്തത്. പ്രതികള്‍ക്കെതിരെ ഭാരതീയ ന്യായ സംഹിതയിലെ 318(4), 316(1), 61, 3(5) എന്നീ വകുപ്പുകള്‍ പ്രകാരമാണ് കേസ് രജിസ്റ്റർ ചെയ്തിരിക്കുന്നത്.
ഹൊസ്ദുർഗ് പോലീസ് ഇൻസ്പെക്ടർ കെ പി ഷൈനിന്‍റെ നേതൃത്വത്തിലാണ് നിലവില്‍ അന്വേഷണം പുരോഗമിക്കുന്നത്. എസ്‌ഐ പി എ അബ്ദുല്‍ ബാസിതിനെ അന്വേഷണ ഉദ്യോഗസ്ഥനായി നിയോഗിച്ചിട്ടുണ്ട്. പരാതിയില്‍ ഉന്നയിച്ച ആരോപണങ്ങള്‍, വിവാഹനിശ്ചയവുമായി ബന്ധപ്പെട്ട സാഹചര്യങ്ങള്‍, പണവും ഐഫോണും കൈമാറിയതിൻ്റെ ബാങ്ക് വിശദാംശങ്ങള്‍ എന്നിവ പോലീസ് പരിശോധിച്ചുവരികയാണ്.
Leave a Reply