Mazgaon Morya : गणेशोत्सवाच्या पार्श्वभूमीवर मुंबईत पुन्हा एकदा एक अनुचित प्रकार घडल्याचा व्हिडिओ सध्या सोशल मीडियावर व्हायरल होत आहे. गणपतीच्या मिरवणुकीदरम्यान कथितरित्या अंडी फेकल्याच्या घटनेने तणाव निर्माण झाल्याची माहिती समोर आली आहे. मिरवणूक पुढे जात असताना, जवळच्या एका इमारतीतून अंडी फेकण्यात आल्याचा आरोप करण्यात आला आहे. या घटनेमुळे संतप्त झालेल्या काही नागरिकांनी संबंधित इमारतीच्या दिशेने दगडफेक केल्याचे व्हिडीओ देखील समोर आले आहेत.
घटनेची माहिती मिळताच, वरिष्ठ पोलीस अधिकारी आणि कर्मचाऱ्यांनी तात्काळ घटनास्थळी दाखल होत परिस्थिती नियंत्रणात आणली.
दरम्यान, याप्रकरणी भायखळा पोलिस ठाण्यात अज्ञात व्यक्तीविरोधात भारतीय न्याय संहिता (BNS) मधील कलम 296 आणि 196 अंतर्गत गुन्हा दाखल करण्यात आला आहे.
नेमके काय घडले?
प्राथमिक माहितीनुसार, माझगावचा मोरया या मंडळाच्या गणपतीची मिरवणूक सुरू असताना मिरवणुकीच्या मार्गावर मोठ्या संख्येने नागरिक उपस्थित होतो, मिरवणूक जल्लोषात आणि उत्साहात पुढे सरकत होती, अशातच अचानक जवळच्या इमारतीतून अंडी फेकण्यात आल्याचा आरोप आहे. या प्रकारामुळे मिरवणुकीत काही काळ गोंधळाचे वातावरण निर्माण झाले. (Mazgaon Morya)
हेही वाचा: मुंबईतील Bhuleshwar Raja दुर्घटनेमागील नेमके कारण आले समोर; गुन्हा दाखल होण्याची शक्यता
मिरवणुकीतील काही संतप्त नागरिकांनी संबंधित इमारतीच्या दिशेने दगडफेक झाल्याचे व्हिडीओमध्ये दिसत असल्याचा दावा करण्यात येत आहे. तसेच काही व्हिडिओमध्ये मिरवणुकीतील लोक संबंधित इमारतीकडे पाहून ‘जय श्री राम’चे नारे देताना, तसेच गणपतीची आरती म्हणताना दिसत आहेत.
परिस्थिती नियंत्रणात
घटनेची माहिती मिळताच, वरिष्ठ पोलीस अधिकारी घटनास्थळी पोहोचल्याचे समोर आले आहे. परिस्थिती नियंत्रणात आणण्यासाठी अतिरिक्त पोलीस बंदोबस्त तैनात करण्यात आल्याची माहिती आहे. मिरवणुकीच्या मार्गावर तसेच संबंधित इमारतीच्या परिसरात पोलिसांकडून परिस्थितीवर लक्ष ठेवण्यात येत आहे. (Mazgaon Morya)
दरम्यान, सोशल मीडियावर व्हायरल झालेल्या व्हिडीओंच्या आधारे घटनेची पार्श्वभूमी आणि नेमका घटनाक्रम समजून घेण्याचा प्रयत्न केला जात आहे. व्हिडीओतील प्रत्येक दृश्य स्वतंत्रपणे पोलिसांच्या तपासातून पडताळले जाणे आवश्यक आहे.
हेही वाचा: Veer Savarkar : अजरामर आत्मकथन ‘माझी जन्मठेप’
सोशल मीडियावरील व्हिडीओबाबत सावधगिरी
घटनेचे अनेक व्हिडीओ सोशल मीडियावर प्रसारित होत आहेत. मात्र, व्हिडीओ कोणत्या ठिकाणचा आहे, तो नेमका कधीचा आहे आणि त्यातील दृश्यांचा घटनाक्रमाशी थेट संबंध आहे का, याची अधिकृत पुष्टी होणे महत्त्वाचे आहे. (Mazgaon Morya)
विशेषतः धार्मिक मिरवणुकीशी संबंधित संवेदनशील घटनांमध्ये अपूर्ण किंवा जुने व्हिडीओ मोठ्या प्रमाणावर शेअर झाल्यास परिस्थिती आणखी तणावपूर्ण होऊ शकते. त्यामुळे नागरिकांनी अपुष्ट माहिती आणि अफवा पसरवणे टाळावे, असे आवाहन प्रशासनाकडून केले जाण्याची शक्यता आहे. (Mazgaon Morya)
सध्या पोलिसांसमोर या प्रकरणात दोन महत्त्वाची आव्हाने आहेत—अंडी नेमकी कोणी आणि कुठून फेकली, तसेच त्यानंतर दगडफेक कोणी केली, याची स्वतंत्रपणे ओळख पटवणे. सीसीटीव्ही फुटेज, घटनास्थळी उपलब्ध व्हिडीओ आणि प्रत्यक्षदर्शींची माहिती तपासासाठी महत्त्वाची ठरणार आहे.
हेही पाहा:
Leave a Reply