ಜೂನ್ನಿಂದ ಸೆಪ್ಟೆಂಬರ್ವರೆಗೆ ಮಳೆ ಪ್ರಮಾಣದ ಏರಿಳಿತ, ನೀರಿನ ಲಭ್ಯತೆ ಹಾಗೂ ಮುಂದಿನ ದಿನಗಳಲ್ಲಿ ಉಷ್ಣತೆ ಹೆಚ್ಚುವ ಸಾಧ್ಯತೆ ಶಿಕ್ಷಣ ಸಂಸ್ಥೆಗಳಿಗೆ ಹೊಸ ಸವಾಲು ತಂದಿದೆ.
ಮಳೆಗಾಲದಲ್ಲೇ ಬಿರುಬಿಸಿಲು:
ದಕ್ಷಿಣ ಕನ್ನಡದಲ್ಲಿ ಸೆಪ್ಟೆಂಬರ್ ಅಂತ್ಯದವರೆಗೆ ಸಾಮಾನ್ಯ ಮಳೆ 3,528 ಮಿ.ಮೀ. ಇರಬೇಕಾಗಿದ್ದರೆ, ಈ ವರ್ಷ 2,505.9 ಮಿ.ಮೀ. ಮಳೆಯಾಗಿದ್ದು, ಸುಮಾರು ಶೇ.29ರಷ್ಟು ಕೊರತೆಯಾಗಿದೆ. ಇದರ ಪರಿಣಾಮವೇ ತಾಪಮಾನ ಏರಿಕೆ.
ದಕ್ಷಿಣ ಕನ್ನಡದಲ್ಲಿ ಬಿಸಿಲಿನ ಅನುಭವ ಹೆಚ್ಚಾಗಿದ್ದು, ಸೆ.25ರಂದು ಮಳೆಯ ಆಗಮನದಿಂದ ತಾತ್ಕಾಲಿಕವಾಗಿ ಉಷ್ಣತೆ ಇಳಿಕೆಯಾಗಿದೆ. ಮಂಗಳೂರಿನಲ್ಲಿ ಗರಿಷ್ಠ ತಾಪಮಾನ 33.7 ಡಿಗ್ರಿ ಸೆಲ್ಸಿಯಸ್ವರೆಗೆ ಏರಿಕೆಯಾಗಿತ್ತು. ಇದು ಮಾರ್ಚ್-ಏಪ್ರಿಲ್ ತಿಂಗಳಲ್ಲಿ ದಾಖಲಾಗುವ ತಾಪಮಾನ. ಇದರ ಮೊದಲ ಪರಿಣಾಮ ಶಾಲೆ-ಕಾಲೇಜುಗಳ ನೀರಿನ ನಿರ್ವಹಣೆ ಮೇಲೆ ಬೀಳುವ ಸಾಧ್ಯತೆ ಇದೆ. ಕುಡಿಯುವ ನೀರು, ಶೌಚಾಲಯ, ಕೈತೊಳೆಯುವ ವ್ಯವಸ್ಥೆ ಹಾಗೂ ಮಧ್ಯಾಹ್ನದ ಊಟದ ಅಡುಗೆಗೆ ನೀರಿನ ಲಭ್ಯತೆ ಖಚಿತಪಡಿಸಿಕೊಳ್ಳಬೇಕಾಗುತ್ತದೆ.
ಆರೋಗ್ಯದ ಮೇಲೂ ನಿಗಾ:
ಬಿಸಿಲಿನ ತೀವ್ರತೆ ಹೆಚ್ಚಿದರೆ ಬೆಳಗ್ಗೆ ಮತ್ತು ಮಧ್ಯಾಹ್ನ ತರಗತಿಗಳಲ್ಲಿ ವಿದ್ಯಾರ್ಥಿಗಳಿಗೆ ಅಸ್ವಸ್ಥತೆ, ದಣಿವು, ನಿರ್ಜಲೀಕರಣದಂತಹ ಸಮಸ್ಯೆಗಳ ಅಪಾಯ ಹೆಚ್ಚಬಹುದು. ವಿಶೇಷವಾಗಿ ಪ್ರಾಥಮಿಕ ಶಾಲಾ ಮಕ್ಕಳಲ್ಲಿ ಹೆಚ್ಚಿನ ಎಚ್ಚರಿಕೆ ಅಗತ್ಯ. ಬಿಸಿಲಿನ ತೀವ್ರತೆ ಹೆಚ್ಚಿದರೆ ಮಧ್ಯಾಹ್ನದ ಕ್ರೀಡಾ ಚಟುವಟಿಕೆ, ಪೆರೇಡ್, ಎನ್ಸಿಸಿ-ಎನ್ನೆಸ್ಸೆಸ್ ಚಟುವಟಿಕೆ ಹಾಗೂ ಹೊರಾಂಗಣ ಕಾರ್ಯಕ್ರಮಗಳ ಸಮಯವನ್ನು ಮರುನಿಗದಿಪಡಿಸುವ ಅಗತ್ಯ ಎದುರಾಗಬಹುದು. ಕಾಲೇಜುಗಳಲ್ಲೂ ವಿದ್ಯಾರ್ಥಿಗಳ ಹಾಜರಾತಿ ಮತ್ತು ಆರೋಗ್ಯದ ದೃಷ್ಟಿಯಿಂದ ಹೊರಾಂಗಣ ಚಟುವಟಿಕೆಗಳ ಬಗ್ಗೆ ಮುನ್ನೆಚ್ಚರಿಕೆ ಅಗತ್ಯವಾಗಬಹುದು.
ಈ ವರ್ಷ ದಕ್ಷಿಣ ಕನ್ನಡದ ಹಲವು ತಾಲೂಕುಗಳಲ್ಲಿ ಮಳೆಗೆ ಶಾಲೆಗಳಿಗೆ ರಜೆ ನೀಡಲಾಗಿತ್ತು. ಕಳೆದುಹೋದ ಬೋಧನಾ ದಿನಗಳನ್ನು ಸರಿದೂಗಿಸಲು ಸೆ.12ರಿಂದ ಶನಿವಾರ ಪೂರ್ಣದಿನ ತರಗತಿ ನಡೆಸುವಂತೆ ಶಿಕ್ಷಣ ಇಲಾಖೆ ಸೂಚಿಸಿದೆ. ಹೀಗಾಗಿ ಒಂದೆಡೆ ಮಳೆ ರಜೆಯಿಂದ ಕಳೆದುಹೋದ ಪಾಠದ ದಿನಗಳನ್ನು ತುಂಬಿಸುವ ಒತ್ತಡ. ಮತ್ತೊಂದೆಡೆ ಬಿಸಿಲು ನೀರಿನ ಸಮಸ್ಯೆ ಎದುರಾಗುವ ಸಾಧ್ಯತೆ. ಹೀಗಾಗಿ ಬೇಸಿಗೆ ಬಂದ ನಂತರ ಕ್ರಮ ಕೈಗೊಳ್ಳುವ ಬದಲು ಈಗಿನಿಂದಲೇ ಶಾಲಾ ಮಟ್ಟದಲ್ಲಿ ‘ಹೀಟ್ ಮ್ಯಾನೇಜ್ಮೆಂಟ್ ಪ್ಲ್ಯಾನ್’ ಸಿದ್ಧಪಡಿಸುವ ಅಗತ್ಯವಿದೆ.
ಶಿಕ್ಷಣ ಸಂಸ್ಥೆಗಳಿಗೆ 5 ಮುನ್ನೆಚ್ಚರಿಕೆ
ಪ್ರತಿದಿನ ಕುಡಿಯುವ ನೀರಿನ ಲಭ್ಯತೆ ಖಚಿತಪಡಿಸಿಕೊಳ್ಳುವುದು
ಶೌಚಾಲಯಗಳಿಗೆ ಸಮರ್ಪಕ ನೀರು ಒದಗಿಸುವುದು
ಬಿಸಿಲಿನ ತೀವ್ರತೆಯಲ್ಲಿ ಹೊರಾಂಗಣ ಚಟುವಟಿಕೆ ಕಡಿತಗೊಳಿಸುವುದು
ವಿದ್ಯಾರ್ಥಿಗಳಿಗೆ ಹೈಡ್ರೇಷನ್ ಬ್ರೇಕ್ ಮತ್ತು ಆರೋಗ್ಯ ನಿಗಾ
ಅಗತ್ಯವಿದ್ದರೆ ತರಗತಿ ಸಮಯ ಮರುನಿಗದಿ ಮಾಡುವುದು
ಹೀಟ್ವೇವ್ ಕ್ರಿಯಾಯೋಜನೆ
ಕರ್ನಾಟಕದ ಹೀಟ್ವೇವ್ ಕ್ರಿಯಾಯೋಜನೆಯಲ್ಲಿಯೇ ಶಾಲೆಗಳಲ್ಲಿ ಗಾಳಿ ಸಂಚಾರ ಹೆಚ್ಚಿಸುವುದು, ಹೆಚ್ಚುವರಿ ಫ್ಯಾನ್ಗಳ ವ್ಯವಸ್ಥೆ, ನೆರಳು ಒದಗಿಸುವುದು, ಹೊರಾಂಗಣ ಚಟುವಟಿಕೆಗಳಿಗೆ ಪರ್ಯಾಯ ಸ್ಥಳ ಗುರುತಿಸುವುದು ಹಾಗೂ ವಿದ್ಯಾರ್ಥಿಗಳಲ್ಲಿ ಹೀಟ್ ಸ್ಟೆರಸ್ ಲಕ್ಷಣಗಳ ಕುರಿತು ಜಾಗೃತಿ ಮೂಡಿಸುವಂತೆ ಸೂಚಿಸಲಾಗಿದೆ. ತೀವ್ರ ಬಿಸಿಲಿನ ಸಂದರ್ಭ ಹೊರಾಂಗಣ ಹಾಗೂ ಕ್ರೀಡಾ ಚಟುವಟಿಕೆಗಳನ್ನು ಮುಂದೂಡುವ ಅಥವಾ ಸ್ಥಗಿತಗೊಳಿಸುವ ಬಗ್ಗೆಯೂ ಶಿಫಾರಸು ಮಾಡಲಾಗಿದೆ. ಶಾಲಾ ಶಿಕ್ಷಕರು ಹಾಗೂ ಕಾಲೇಜು ಸಿಬ್ಬಂದಿಗೆ ಹೀಟ್ ಸ್ಟೆ್ರಸ್ನ ಆರಂಭಿಕ ಲಕ್ಷಣಗಳನ್ನು ಗುರುತಿಸುವುದು, ತಕ್ಷಣ ನೀರು ನೀಡುವುದು, ನೆರಳಿನ/ತಂಪಾದ ಸ್ಥಳಕ್ಕೆ ಕರೆದೊಯ್ಯುವುದು ಮತ್ತು ಅಗತ್ಯವಿದ್ದರೆ ವೈದ್ಯಕೀಯ ನೆರವು ಪಡೆಯುವ ಕುರಿತು ಅರಿವು ಅಗತ್ಯ. ಕರ್ನಾಟಕದ ಹೀಟ್ವೇವ್ ಮಾರ್ಗಸೂಚಿಗಳಲ್ಲೂ ವಿದ್ಯಾರ್ಥಿಗಳು ಹಾಗೂ ಸಿಬ್ಬಂದಿಯಲ್ಲಿ ಶಾಖದ ಒತ್ತಡದ ಲಕ್ಷಣಗಳ ಗುರುತಿಸುವಿಕೆ ಮತ್ತು ಮೇಲ್ವಿಚಾರಣೆಗೆ ಒತ್ತು ನೀಡಲಾಗಿದೆ.
ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಈ ಬಾರಿ ಮಳೆಯ ಪ್ರಮಾಣ ಇಳಿಕೆಯಾಗಿದೆ. ಆದರೆ ಶಾಲೆಗಳಲ್ಲಿ ಮುಂದೆ ನೀರಿನ ಸಮಸ್ಯೆ ಕಾಣಿಸಿಕೊಳ್ಳಬಹುದಾ ಎನ್ನುವ ವಿಚಾರದಲ್ಲಿ ಸ್ವಷ್ಟತೆ ಇಲ್ಲ. ಆದರೆ ಇದಕ್ಕೆ ಬೇಕಾದ ವಿಚಾರಗಳಲ್ಲಿ ಜಿಲ್ಲಾಡಳಿತ ಕ್ರಮ ಕೈಗೊಳ್ಳಬಹುದು. ಅಲ್ಲಿಂದಲೇ ಮುಂದಿನ ದಿನಗಳಲ್ಲಿ ಸೂಚನೆ ಸಿಗಬಹುದು ಎಂದಿದ್ದಾರೆ ಜಿ.ಎಸ್. ಶಶಿಧರ್, ಉಪ ನಿರ್ದೇಶಕ, ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಇಲಾಖೆ.
Leave a Reply