శ్రీకాకుళంలో కుండపోత.. రాష్ట్రంలో పలుచోట్ల భారీ వర్షాలు
ఉత్తరాంధ్ర జిల్లాల్లో నేడు అత్యంత భారీ వర్షాలు
నేటిరాత్రి విశాఖ-గోపాల్పూర్ మధ్య తీరం దాటే అవకాశం
భారీ వర్షాలకు జలమయమైన శ్రీకాకుళం ఆర్టీసీ కాంప్లెక్స్
ఈనాడు-అమరావతి, విశాఖపట్నం, బృందం: వాయవ్య బంగాళాఖాతంలో కొనసాగుతున్న వాయుగుండం.. మంగళవారం తీవ్ర వాయుగుండంగా బలపడింది. బుధవారం రాత్రికి ఉత్తర కోస్తా-దక్షిణ ఒడిశా తీరంలోని విశాఖపట్నం-గోపాల్పూర్ మధ్య ఇది తీవ్ర వాయుగుండంగానే తీరం దాటే అవకాశం ఉందని వాతావరణశాఖ తెలిపింది. దీని ప్రభావంతో సోమ, మంగళవారాల్లో ఉత్తరాంధ్రతోపాటు రాష్ట్రంలోని పలు ప్రాంతాల్లో ఒక మోస్తరు నుంచి భారీవర్షాలు కురిశాయి. బుధ, గురువారాల్లో పలుచోట్ల అత్యంత భారీ వర్షాలు కురిసే అవకాశం ఉందని సూచించింది. ఉత్తరాంధ్ర జిల్లాల్లో ఆకస్మిక వరదలొచ్చే అవకాశం ఉందని రెడ్ ఎలర్ట్ ప్రకటించింది. తీవ్ర వాయుగుండం తీరం దాటే సమయంలో గంటకు 50-60 కి.మీ. వేగంతో ఈదురుగాలులు వీయనున్నాయి. మత్స్యకారులు సముద్రంలోకి వేటకు వెళ్లొద్దని హెచ్చరికలు జారీచేశారు. ఈ ప్రభావంతో రాయలసీమ, కోస్తాజిల్లాల్లోని పలుచోట్ల భారీవర్షాలు కురిశాయి. శ్రీకాకుళం జిల్లాలో మంగళవారం ఉదయం నుంచి ఎడతెరపి లేకుండా వర్షాలు కురుస్తున్నాయి.
- మంగళవారం ఉదయం 8.30-9 గంటల మధ్య అత్యధికంగా శ్రీకాకుళం జిల్లా పలాసలో 100.75 మి.మీ, అల్లూరి సీతారామరాజు జిల్లా గంపరాయిలో 73.0, విశాఖపట్నం జిల్లా మధురవాడలో 69.5, నంద్యాల జిల్లా కనాలలో 65.91, విజయనగరం జిల్లా భోగాపురంలో 62.9, అనకాపల్లి జిల్లా పరవాడలో 60.0 మి.మీ. వర్షపాతం నమోదైంది.
- సోమవారం ఉదయం నుంచి మంగళవారం ఉదయం 8.30 గంటల వరకు అత్యధికంగా.. నంద్యాల జిల్లా పాములపాడులో 98.75 మి.మీ, శ్రీకాకుళం జిల్లా విజయరామపురంలో 90.5, చిత్తూరు జిల్లా బంగారుపాళెంలో 88.5, పల్నాడు జిల్లా గండివేములలో 78.81 మి.మీ. వర్షపాతం నమోదైంది.
- పార్వతీపురం మన్యం జిల్లా ఏగోటివలసలోని తోటపల్లి కాలువలో స్నానానికి దిగిన హేమంత్కృష్ణ(39) అనే యువకుడు గల్లంతయ్యాడు.
ఉత్తరాంధ్ర జిల్లాలకు రెడ్ ఎలర్ట్
అత్యంత భారీవర్షాలు కురిసే అవకాశం ఉండటంతో వరద ముప్పు పొంచి ఉంది. బుధవారం ఒడిశాలోని 9 జిల్లాలతో పాటు అనకాపల్లి, విజయనగరం, విశాఖ, శ్రీకాకుళం, అల్లూరి సీతారామరాజు జిల్లాలకు రెడ్ ఎలర్ట్ జారీచేసింది. విశాఖ, అనకాపల్లి, కాకినాడ, ఏలూరు, కాకినాడ, తూర్పుగోదావరి జిల్లాల్లో భారీ నుంచి అతి భారీ వర్షాలు.. పశ్చిమగోదావరి, కోనసీమ, ఎన్టీఆర్, కృష్ణా, గుంటూరు జిల్లాల్లోని పలుచోట్ల భారీ వర్షాలు పడే అవకాశం ఉంది.
- అతిభారీ వర్షాల హెచ్చరికలతో.. శ్రీకాకుళం, విజయనగరం, పార్వతీపురం మన్యం జిల్లాల్లోని పాఠశాలలకు సెలవు ప్రకటించారు.
- ఉత్తరకోస్తాకు భారీ వర్ష సూచన ఉందని, జలవనరులశాఖ అధికారులు అప్రమత్తంగా ఉండాలని మంత్రి నిమ్మల రామానాయుడు సూచించారు. ఆయన అధికారులతో మంగళవారం టెలి కాన్ఫరెన్సు నిర్వహించారు.
- వాయుగుండం తీవ్రతపై ప్రజలకు ఎప్పటికప్పుడు హెచ్చరిక సందేశాలు పంపాలని హోం, విపత్తుల నిర్వహణ శాఖ మంత్రి వంగలపూడి అనిత అధికారులను ఆదేశించారు. మంగళవారం ఆమె కుంచనపల్లిలోని విపత్తుల నిర్వహణ సంస్థ కార్యాలయంలో అధికారులతో సమావేశం నిర్వహించారు.
- వర్షాభావ పరిస్థితులు, నీటి ఎద్దడిని ఉపగ్రహ ఆధారంగా గుర్తించి.. రైతులకు సూచనలు అందించేందుకు ప్రభుత్వం కృష్ణా జిల్లా గన్నవరంలోని సమీకృత కాల్ సెంటర్లో ఎల్నినో కమాండ్ కంట్రోల్ సెంటర్ ఏర్పాటు చేసింది.
Leave a Reply