ఇంటర్నెట్‌ డెస్క్‌: జీవిత భాగస్వాములైన విజయ్‌ దేవరకొండ (Vijay Deverakonda), రష్మిక (Rashmika) భార్యాభర్తలుగా నటిస్తున్న చిత్రం ‘రణబాలి’ (Ranabaali). రాహుల్‌ సాంకృత్యాన్‌ (Rahul Sankrityan) దర్శకుడు. అక్టోబరు 16న ఈ చిత్రం విడుదల కానున్న నేపథ్యంలో, ఈ ముగ్గురూ ఓ ఇంటర్వ్యూలో పాల్గొన్నారు. ఈ సందర్భంగా రష్మికతో తన పెళ్లి గురించి మాట్లాడుతూ విజయ్‌ దేవరకొండ ఓ ఆసక్తికర విషయం పంచుకున్నారు. అందరిలా పెళ్లి మంటపంలో కాకుండా, బీచ్‌లో షార్ట్స్‌ ధరించి రష్మికను వివాహం చేసుకోవాలని తనకుండేదన్నారు. రష్మిక కూడా దానికి అంగీకరించినట్లు చెప్పారు. అయితే తన తల్లిదండ్రులు అంగీకరించలేదని, అందుకే మంటపంలోనే గ్రాండ్‌గా పెళ్లిచేసుకున్నామన్నారు.
‘‘నాలో ఇద్దరు మనుషులున్నారు. ఏం చేసినా సింపుల్‌గా ఉండాలన్నది ఒకరి ఆలోచన అయితే, అందరూ మాట్లాడుకొనేలా ఎక్స్‌ట్రీమ్‌గా ఉండాలన్నది మరొకరి ఆలోచన. పెళ్లి విషయంలోనూ అదే జరిగింది. ముందు ఓ అందమైన బీచ్‌లో షార్ట్స్‌ వేసుకొని స్నేహితుల సమక్షంలో సింపుల్‌గా పెళ్లి చేసుకోవాలనుకున్నా. ఏ బీచ్‌ అయితే బాగుంటుందని కొందరు ఫ్రెండ్స్‌ని కూడా అడిగా. అయితే ఇంట్లో నా ఆలోచన చెబితే మా అమ్మ షాకై నన్ను కొట్టినంత పనిచేసింది. ఇంట్లో పెద్దకొడుకు అలా పెళ్లి చేసుకుంటే ఏం బాగుంటుందని కొన్నిరోజుల పాటు బాధపడింది. దీంతో ఆ ఆలోచనను పక్కనపెట్టి మంటపంలోనే ధూంధాంగా పెళ్లిచేసుకున్నా’’ అని విజయ్‌ వివరించారు.
దీనిపై రష్మిక స్పందిస్తూ.. ‘‘పెళ్లి ఎలా చేసుకోవాలనుకున్నా ఓకే అని విజయ్‌తో చెప్పా. ఎందుకంటే తను సంతోషంగా ఉంటే నేనూ సంతోషంగా ఉంటా. అయితే పెళ్లి సమయంలో మాత్రం పెద్దవారికి ఓ కండీషన్‌ పెట్టాను. పెళ్లికి ముందు, ఆ తరువాత మీరు ఏం చెప్పినా చేస్తాను కానీ, పెళ్లి వేడుక జరిగే మూడు రోజులు మాత్రం నన్ను ఫ్రీగా వదిలేయండి. నేను నా ఫ్రెండ్స్‌తో హ్యాపీగా ఎంజాయ్‌ చేస్తా అని చెప్పా. అన్నట్లే ఆ మూడురోజులూ డ్యాన్స్‌లు చేస్తూ హ్యాపీగా గడిపాను’’ అని చెప్పారు.
Leave a Reply